Showing posts with label Dr. Bharat. Show all posts
Showing posts with label Dr. Bharat. Show all posts

Saturday, January 26, 2019

ਐਫ ਆਈ ਬੀ ਨੇ ਵੀ ਮਨਾਇਆ ਗਣਤੰਤਰ ਦਿਵਸ

ਬੇਲਣ ਬਰਗੇਡ ਵੱਲੋਂ ਸਮਾਜ ਨੂੰ ਨਸ਼ਾ ਅਤੇ ਮਿਲਾਵਟ ਮੁਕਤ ਕਰਨ ਦਾ ਸੱਦਾ 
ਲੁਧਿਆਣਾ: 26 ਜਨਵਰੀ 2019: (ਲੁਧਿਆਣਾ ਸਕਰੀਨ ਬਿਊਰੋ)::  
ਸਮਾਜ ਵਿੱਚ ਹੁੰਦੇ ਜੁਰਮਾਂ ਆਪਣੀ ਨਿੰਜੀ ਹੈਸੀਅਤ ਵਿੱਚ ਬੜੀ ਤਿੱਖੀ ਨਜ਼ਰ ਰੱਖਣ ਵਾਲੀ ਸੰਸਥਾ "ਫਸਟ ਇਨਵੈਸਟੀਗੇਸ਼ਨ ਬਿਊਰੋ" (ਐਫ ਆਈ ਬੀ) ਵੱਲੋਂ ਇਸ ਵਾਰ ਵੀ ਗਣਤੰਤਰ ਦਿਵਸ ਦਾ ਕੌਮੀ ਤਿਓਹਾਰ ਬੜੇ ਹੀ ਜੋਸ਼ੋ ਖਰੋਸ਼ ਅਤੇ ਉਤਸ਼ਾਹ ਨਾਲ ਮਨਾਇਆ ਗਿਆ। ਇਸ ਮੌਕੇ "ਬੇਲਣ ਬਰਗੇਡ" ਅਤੇ "ਨਵਕਿਰਨ ਵੂਮੈਨ ਵੈਲਫੇਅਰ ਐਸੋਸੀਏਸ਼ਨ" ਦੀ ਅਨੀਤਾ ਸ਼ਰਮਾ ਅਤੇ ਆਰ ਟੀ ਆਈ ਵਾਲੇ ਸਰਗਰਮ ਪੱਤਰਕਾਰ ਸ਼ਿਰੀਪਾਲ ਸ਼ਰਮਾ,  ਭਗਵੰਤ ਗਰੇਵਾਲ, ਪਰੇਮ ਗਰੋਵਰ,  ਅਸ਼ਵਨੀ ਸੱਗੀ, ਰਾਜੇਸ਼ ਕਪੂਰ, ਪਰਦੀਪ ਸ਼ਰਮਾ ਇਪਟਾ, ਓਂਕਾਰ ਸਿੰਘ ਪੁਰੀ  ਸਮੇਤ ਕਈ ਸ਼ਖਸੀਅਤਾਂ ਨੇ ਸਰਗਰਮ ਸ਼ਿਰਕਤ ਕੀਤੀ। ਅਨੀਤਾ ਸ਼ਰਮਾ ਨੇ ਇਸ ਵਾਰ ਫੇਰ ਲੋਕਾਂ ਦੇ ਦਿਲਾਂ ਨੂੰ ਹਲੂਣਾ ਦੇਣ ਵਾਲੇ ਸ਼ਬਦਾਂ ਵਿੱਚ ਸਮਾਜ ਨੂੰ ਨਸ਼ਿਆਂ ਅਤੇ ਮਿਲਾਵਟਖੋਰੀ ਤੋਂ ਮੁਕਤ ਕਰਨ ਦਾ ਸੱਦਾ ਦਿੱਤਾ। ਉਹਨਾਂ ਸਮੂਹ ਲੋਕਾਂ ਨੂੰ ਇਸ ਮਕਸਦ ਲਈ ਅੱਗੇ ਆਉਣ ਵਾਸਤੇ ਵੀ ਕਿਹਾ। ਉਹਨਾਂ ਦੱਸਿਆ ਕਿ ਬਿਮਾਰ ਅਤੇ ਅਪਾਹਜ ਬੱਚਿਆਂ ਦੇ ਜਨਮ ਲਈ ਮਿਲਾਵਟੀ ਦੁੱਧ ਅਤੇ ਹੋਏ ਚੀਜ਼ਾਂ ਵੀ ਜ਼ਿੰਮੇਵਾਰ ਹਨ। 
ਇਸੇ ਦੌਰਾਨ ਉਹਨਾਂ ਲੁਧਿਆਣਾ ਸਕਰੀਨ ਨਾਲ ਗੱਲਬਾਤ ਕਰਦਿਆਂ ਦੱਸਿਆ ਕਿ ਹਾਲ ਹੀ ਵਿੱਚ ਉਹਨਾਂ ਆਪਣੀ ਕੈਨੇਡਾ ਫੇਰੀ ਦੌਰਾਨ ਦੇਖਿਆ ਕਿ ਉਹ ਥਾਂ ਇਸ ਧਰਤੀ ਦਾ ਸਵਰਗ ਹੈ। ਉੱਥੇ ਮਨੁੱਖੀ ਜ਼ਿੰਦਗੀ ਦੀ ਕਦਰ ਹੈ ਭਾਵੇਂ ਕੋਈ ਗਰੀਬ ਹੋਵੇ ਜਾਂ ਅਮੀਰ। ਜੇ ਕਿਸੇ ਕੋਲ ਸਰਦੀ ਜਾਂ ਗਰਮੀ ਕੱਟਣ ਲਈ ਕੋਈ ਘਰ ਨਾ ਵੀ ਹੋਵੇ ਤਾਂ ਵੀ ਉਸਨੂੰ ਫੁਟਪਾਥਾਂ ਉੱਤੇ ਨਹੀਂ ਰੁਲਣਾ ਪੈਂਦਾ। ਸਿਰਫ ਇੱਕ ਫੋਨ ਕਾਲ ਜਿਹਡ਼ੀ ਕੋਈ ਰਾਹ ਜਾਂਦਾ ਵਿਅਕਤੀ ਵੀ ਕਰ ਸਕਦਾ ਹੈ ਅਤੇ ਫੁੱਟਪਾਥ ਉੱਤੇ ਪਿਆ ਵਿਅਕਤੀ ਕਿਸੇ ਆਰਾਮਦੇਹ ਸ਼ੈਲਟਰ ਹਾਊਸ ਵਿੱਚ  ਪਹੁੰਚ ਜਾਂਦਾ ਹੈ। ਉੱਥੋਂ ਦੇ ਮਕਾਨ ਬਹੁਤ ਘੱਟ ਲਾਗਤ ਵਿੱਚ ਬਣਦੇ ਹਨ ਪਰ ਉਹਨਾਂ ਵਿੱਚ ਰਹਿੰਦਿਆਂ ਨਾਂ ਤਾਂ ਸਰਦੀ ਲੱਗਦੀ ਹੈ ਅਤੇ ਨਾ ਹੀ ਗਰਮੀ। 
ਨਸ਼ਿਆਂ ਬਾਰੇ ਗੱਲ ਕਰਦਿਆਂ ਉਹਨਾਂ ਕਿਹਾ ਕਿ ਉੱਥੇ ਵੀ ਸਰਕਾਰਾਂ ਸ਼ਰਾਬ ਤੋਂ ਪੈਸੇ ਕਮਾਉਂਦੀਆਂ ਹਨ ਪਰ ਇਥੋਂ ਦੀ ਤਰਾਂ ਉੱਥੇ ਥਾਂ ਥਾਂ ਠੇਕੇ ਨਜ਼ਰ ਨਹੀਂ ਆਉਂਦੇ। ਹਰ ਚੀਜ਼ ਬਰਾਂਡਿਡ ਅਤੇ ਪੈਕਿੰਗ ਵਾਲੀ ਹੈ ਜਿਸ ਵਿੱਚ ਕੁਆਲਿਟੀ ਦੇ ਮਾਮਲੇ 'ਤੇ ਕੋਈ ਸਮਝੌਤਾ ਨਹੀਂ ਕੀਤਾ ਜਾਂਦਾ। 
ਉਹਨਾਂ ਕਿਹਾ ਕਿ ਸਾਨੂੰ ਵੀ ਮਹਾਨਤਾ ਵਾਲੇ ਨਾਅਰੇ ਲਾਉਣ ਤੋਂ ਪਹਿਲਾ ਮਨੁੱਖਤਾ ਲਈ ਮਹਾਨਤਾ ਵਾਲਿਆਂ ਗੱਲਾਂ ਇਥੇ ਵੀ ਪੈਦਾ ਕਰਨੀਆਂ ਚਾਹੀਦੀਆਂ ਹਨ। 
ਉਹਨਾਂ ਐਫ ਆਈ ਬੀ ਦੇ ਟੀਮ ਦਾ ਵੀ ਧੰਨਵਾਦ ਕੀਤਾ ਕਿ ਇਹ ਟੀਮ ਹਰ ਵਾਰ 15 ਅਗਸਤ ਅਤੇ 26 ਜਨਵਰੀ ਨੂੰ ਦੇਸ਼ ਭਗਤੀ ਦਾ ਰੰਗ ਜਗਾਉਣ ਲਈ ਕੁਝ ਨਾ ਕੁਝ ਵਿਸ਼ੇਸ਼ ਕਰਦੀ ਰਹਿੰਦੀ ਹੈ।  ਉਹਨਾਂ ਅੱਜ ਦੇ ਆਯੋਜਨ ਦੀ ਵੀ ਸ਼ਲਾਘਾ ਕੀਤੀ। 
ਇਸ ਸਮਾਗਮ ਵਿੱਚ ਆਏ ਹੋਏ ਖਾਸ ਮਹਿਮਾਨਾਂ ਭਗਵੰਤ ਗਰੇਵਾਲ, ਅਸ਼ਵਨੀ ਸੱਗੀ, ਰਾਜੇਸ਼ ਕਪੂਰ, ਪਰੇਮ ਗਰੋਵਰ, ਓਂਕਾਰ ਸਿੰਘ ਪੁਰੀ ਅਤੇ ਹੋਰਨਾਂ ਨੇ ਵੀ ਦੇਸ਼ ਅਤੇ ਸਮਾਜ ਲਈ ਕੁਝ ਠੋਸ ਕਦਮ ਚੁੱਕੇ ਜਾਣ ਦਾ ਸੰਕਲਪ ਦੁਹਰਾਇਆ ਅਤੇ ਕਿਹਾ ਕਿ ਅਸੀਂ ਆਪਣੀ ਵਿੱਤ ਅਤੇ ਸਮਰਥਾ ਅਨੁਸਾਰ ਹਮੇਸ਼ਾਂ ਕੁਝ ਨ ਕੁਝ ਕਰਦੇ ਰਹਾਂਗੇ। ਐਫ ਆਈ ਬੀ ਦੇ ਮੁਖੀ ਡਾਕਟਰ ਭਾਰਤ ਨੇ ਆਏ ਹੋਏ ਮਹਿਮਾਨਾਂ ਦਾ ਧੰਨਵਾਦ ਕੀਤਾ ਅਤੇ ਸਮੂਹ ਲੋਕਾਂ ਨੂੰ ਸੱਦਾ ਦਿੱਤਾ ਕਿ ਉਹ ਦੇਸ਼ ਦੀ ਰਾਖੀ ਲਾਇ ਆਪੋ ਆਪਣੇ ਖੇਤਰਾਂ ਵਿੱਚ ਹਮੇਸ਼ਾਂ ਤਿਆਰ ਰਹਿਣ ਕਿਓਂਕਿ ਦੁਸ਼ਮਣ ਕਿਸੇ ਵੀ ਥਾਂ ਕੋਈ ਵਾਰ ਕਰ ਸਕਦਾ ਹੈ। ਜੇ ਦੇਸ਼ ਸਲਾਮਤ ਹੈ ਤਾਂ ਬਾਕੀ ਸਭ ਕੁਝ ਵੀ ਠੀਕ ਹੋ ਜਾਵੇਗਾ।