ਸਿਟੀਜ਼ਨਜ਼ ਐਕਸ਼ਨ ਫਰੰਟ ਵੱਲੋਂ ਲੁਧਿਆਣਾ ਵਿੱਚ ਜ਼ੋਰਦਾਰ ਰੋਸ ਮੁਜ਼ਾਹਰਾ
ਲੁਧਿਆਣਾ: 4 ਜੂਨ 2021: (ਕਾਰਤਿਕਾ ਸਿੰਘ//ਲੁਧਿਆਣਾ ਸਕਰੀਨ)::ਲੋਕ ਦੁਖੀ ਹਨ ਅਤੇ ਮਜਬੂਰ ਹੋ ਕੇ ਉਹੀ ਰਸਤਾ ਚੁਣ ਰਹੇ ਹਨ ਜਿਹੜਾ ਉਹਨਾਂ ਦੀ ਜ਼ਿੰਦਗੀ ਨੂੰ ਖਤਰਿਆਂ ਵਿਚ ਲੈ ਜਾਵੇਗਾ। ਉਹ ਕੋਵਿਡ ਤੋਂ ਬਚਾਓ ਕਰਨ ਵਾਲੇ ਟੀਕੇ ਨਹੀਂ ਲਗਵਾ ਰਹੇ ਕਿਓਂਕਿ ਨਿਜੀ ਹਸਪਤਾਲਾਂ ਵਿੱਚ ਇਹ ਬਹੁਤ ਮਹਿੰਗੇ ਲੱਗ ਰਹੇ ਹਨ। ਪ੍ਰਤੀ ਵਿਅਕਤੀ ਇੱਕ ਹਜ਼ਾਰ ਰੁਪਏ ਤੋਂ ਵੀ ਵੱਧ। ਉਹ ਕੋਵਿਡ ਤੋਂ ਬਚਾਓ ਵਾਲਿਆਂ ਦਵਾਈਆਂ ਵੀ ਨਹੀਂ ਲੈ ਰਹੇ ਕਿਓਂਕਿ ਇਹ ਵੀ ਸਸਤੀਆਂ ਨਹੀਂ ਮਿਲ ਰਹੀਆਂ। ਉਹ ਆਕਸੀਜ਼ਨ ਦਾ ਲੈਵਲ ਵੀ ਚੈਕ ਨਹੀਂ ਕਰਦੇ ਕਿਓਂਕਿ ਇਸਨੂੰ ਜਾਂਚਣ ਵਾਲਾ ਆਕਸੀਮੀਟਰ ਵੀ ਬਲੈਕ ਵਿਚ ਮਿਲ ਰਿਹਾ ਹੈ। ਕੋਵਿਡ ਦੇ ਨਾਲ ਨਾਲ ਬਲੈਕ ਫੰਗਸ ਦੀ ਦਹਿਸ਼ਤ ਵੀ ਤੇਜ਼ੀ ਨਾਲ ਵੱਧ ਰਹੀ ਹੈ। ਲੋਕ ਬੁਖਾਰ ਚੈਕ ਕਰਵਾਉਣ ਤੋਂ ਵੀ ਡਰ ਰਹੇ ਹਨ। ਡਰੇ ਅਤੇ ਸਹਿਮੇ ਹੋਏ ਲੋਕ ਪੁੱਛਦੇ ਹਨ ਕਿ ਕੀ ਕੋਰੋਨਾ ਦੀ ਬਿਮਾਰੀ ਸਾਡੀ ਕਿਸੇ ਗਲਤੀ ਦਾ ਨਤੀਜਾ ਹੈ? ਕੀ ਅਸੀਂ ਦਿਨ ਰਾਤ ਮਿਹਨਤ ਨਹੀਂ ਕਰਦੇ? ਕੀ ਅਸੀਂ ਟੈਕਸ ਨਹੀਂ ਦੇਂਦੇ? ਕਿ ਮਹਾਮਾਰੀ ਵਰਗੀਆਂ ਇਹਨਾਂ ਆਫ਼ਤਾਂ ਤੋਂ ਸਾਡਾ ਬਚਾਓ ਕਰਨਾ ਸਰਕਾਰਾਂ ਦੀ ਇਖਲਾਕੀ ਜ਼ਿੰਮੇਵਾਰੀ ਨਹੀਂ ਸੀ?
ਪਿਛਲੇ ਕੁਝ ਮਹੀਨਿਆਂ ਵਿਚ ਕੋਰੋਨਾ ਦੀ ਮਹਾਂਮਾਰੀ ਦੇ ਕਾਰਨ ਸਿਹਤ ਸੇਵਾਵਾਂ ਦੀ ਮੰਦੀ ਹਾਲਤ ਹੁਣ ਖੁੱਲ੍ਹ ਕੇ ਸਾਹਮਣੇ ਆ ਗਈ ਹੈ। ਸਰਕਾਰ ਵਲੋਂ ਸਿਹਤ ਬਾਰੇ ਅਤੇ ਲੋਕਾਂ ਦੀਆਂ ਜ਼ਿੰਦਗੀਆਂ ਬਾਰੇ ਅਸੰਵੇਦਨਸ਼ੀਲਤਾ ਕਰਕੇ ਜੋ ਇਨ੍ਹਾਂ ਹਾਲਾਤਾਂ ਨੂੰ ਸੰਭਾਲਣ ਲਈ ਤਿਆਰੀ ਵਿਚ ਕੁਤਾਹੀ ਕੀਤੀ ਗਈ ਉਸ ਕਾਰਨ ਲੱਖਾਂ ਲੋਕਾਂ ਦੀਆਂ ਜਾਨਾਂ ਗਈਆਂ ਤੇ ਇਲਾਜ ਲਈ ਲੋਕ ਦਰ ਬਦਰ ਭਟਕਦੇ ਰਹੇ । ਹਾਲਾਤਾਂ ਨੂੰ ਸੁਧਾਰਨ ਅਤੇ ਆਉਣ ਵਾਲੇ ਸਮੇਂ ਵਿੱਚ ਸਿਹਤ ਸੇਵਾਵਾਂ ਨੂੰ ਠੀਕ ਕਰਕੇ ਸਭ ਨੂੰ ਟੀਕੇ ਅਤੇ ਦਵਾਈਆਂ ਮੁਫ਼ਤ ਦਿੱਤੀਆਂ ਜਾਣ ਦੀ ਮੰਗ ਨੂੰ ਲੈ ਕੇ ਅੱਜ ਸਿਟੀਜ਼ਨ ਐਕਸ਼ਨ ਫਰੰਟ ਲੁਧਿਆਣਾ ਅਤੇ ਇੰਡੀਅਨ ਡਾਕਟਰਜ਼ ਫਾਰ ਪੀਸ ਐਂਡ ਡਿਵੈਲਪਮੈਂਟ ਆਈਡੀਪੀਡੀ ਵੱਲੋਂ ਇਕ ਪ੍ਰਦਰਸ਼ਨ ਕੀਤਾ ਗਿਆ। ਇਹ ਪ੍ਰੋਗਰਾਮ ਇੰਡੀਅਨ ਡਾਕਟਰਜ਼ ਫ਼ਾਰ ਪੀਸ ਐਂਡ ਵੱਲੋਂ “ਸਭ ਨੂੰ ਟੀਕਾ ਸਭ ਨੂੰ ਦਵਾਈ” ਦੀ ਕੌਮੀ ਮੁਹਿੰਮ ਦੇ ਤਹਿਤ ਕੀਤਾ ਗਿਆ. ਇਸ ਮੌਕੇ ਤੇ ਬੋਲਦਿਆਂ ਪ੍ਰੋ ਜਗਮੋਹਨ ਸਿੰਘ ਨੇ ਕਿਹਾ ਕੇ ਸਰਕਾਰ ਨਿਰੀ ਪੁਰੀ ਕਾਰਪੋਰੇਟ ਜਗਤ ਨੂੰ ਉਤਸ਼ਾਹਤ ਕਰ ਰਹੀ ਹੈ ਅਤੇ ਸਿਹਤ ਦੇ ਮਾਮਲੇ ਵਿੱਚ ਵੀ ਇਹ ਹੀ ਕਰ ਰਹੀ ਹੈ । ਗ਼ਰੀਬਾਂ ਦੀ ਤਾਂ ਗੱਲ ਹੀ ਛੱਡੋ, ਮੱਧਮ ਵਰਗੀ ਲੋਕ ਵੀ ਹੁਣ ਇਲਾਜ ਕਰਾਉਣ ਲਈ ਬਹੁਤ ਪ੍ਰੇਸ਼ਾਨੀ ਦਾ ਸਾਹਮਣਾ ਕਰ ਰਹੇ ਹਨ ਅਤੇ ਆਰਥਿਕ ਤੌਰ ਤੇ ਬਿਲਕੁਲ ਹੀ ਨਿਚੋੜੇ ਜਾ ਰਹੇ ਹਨ। ਡਾ ਅਰੁਣ ਮਿੱਤਰਾ ਨੇ ਕਿਹਾ ਕਿ ਜਿਸ ਢੰਗ ਦੇ ਨਾਲ ਟੀਕਾਕਰਨ ਦੀ ਕਿਰਿਆ ਸ਼ੁਰੂ ਕੀਤੀ ਗਈ ਤੇ ਜਿਹੜੇ ਟੀਕੇ ਸ਼ੁਰੂ ਵਿਚ ਢਾਈ ਸੌ ਰੁਪਏ ਵਿੱਚ ਲੱਗੇ ਅਤੇ ਜੋ ਹੁਣ ਸਾਢੇ ਅੱਠ ਸੌ ਰੁਪਏ ਵਿਚ ਲੱਗ ਰਿਹਾ ਹੈ ਇਸ ਗੱਲ ਦੀ ਸਰਕਾਰ ਕੋਲ ਕੋਈ ਦਲੀਲ ਨਹੀਂ ਹੈ । ਟੀਕਾ ਇੰਨਾ ਮਹਿੰਗਾ ਹੋਣ ਕਰਕੇ ਲੋਕ ਹੁਣ ਟੀਕੇ ਨਹੀਂ ਲਵਾ ਰਹੇ।
ਇਹ ਚੇਤੇ ਰਹੇ ਕਿ ਆਧਾਰ ਪੂਨਾਵਾਲਾ ਨੇ ਕਿਹਾ ਸੀ ਕਿ ਉਹ ਡੇਢ ਸੌ ਰੁਪਏ ਵਿੱਚ ਵੀ ਮੁਨਾਫ਼ਾ ਕਮਾਉਂਦੇ ਹਨ। ਪਰ ਹੁਣ ਸਾਢੇ ਅੱਠ ਸੌ ਰੁਪਏ ਵਿੱਚ ਦੇਣ ਦਾ ਕੀ ਮਤਲਬ ਹੈ । ਸਰਕਾਰ ਨੇ ਜੋ ਪੈਂਤੀ ਹਜ਼ਾਰ ਕਰੋੜ ਰੁਪਇਆ ਵੈਕਸੀਨ ਲਈ ਤੈਅ ਕੀਤਾ ਹੈ ਉਸਦੇ ਵਿੱਚ ਸਮੁੱਚੇ ਭਾਰਤ ਦੀ ਸਾਰੀ ਆਬਾਦੀ ਨੂੰ ਮੁਫਤ ਟੀਕਾਕਰਨ ਹੋ ਸਕਦਾ ਹੈ । ਜੇਕਰ ਹੋਰ ਪੈਸੇ ਦੀ ਵੀ ਲੋੜ ਹੋਵੇ ਤਾਂ ਕਈ ਹੋਰ ਸੋਮਿਆਂ ਤੋਂ ਪੈਸਾ ਲਿਆ ਜਾ ਸਕਦਾ ਹੈ । ਇਹ ਬੜੀ ਦੁਖਦਾਈ ਗੱਲ ਹੈ ਕਿ ਸੈਂਟਰਲ ਵਿਸਟਾ ਵਰਗੇ ਬੇਲੋੜੇ ਪ੍ਰੋਜੈਕਟ ਤੇ ਇਸ ਮਹਾਂਮਾਰੀ ਦੇ ਦੌਰਾਨ ਜਦੋਂ ਲੱਖਾਂ ਲੋਕਾਂ ਦੀ ਜਾਨ ਜਾ ਰਹੀ ਹੈ, ਵੀਹ ਹਜ਼ਾਰ ਕਰੋੜ ਰੁਪਏ ਖਰਚ ਕੀਤੇ ਜਾ ਰਹੇ ਹਨ । ਡਾ ਗਗਨਦੀਪ ਸਿੰਘ ਨੇ ਕਿਹਾ ਕਿ ਇਸ ਪ੍ਰਾਜੈਕਟ ਨੂੰ ਬੰਦ ਕਰਕੇ ਸਾਰਾ ਪੈਸਾ ਕੋਰੋਨਾ ਵੱਲ ਲਾ ਦੇਣਾ ਚਾਹੀਦਾ ਹੈ। ਐਮ ਐਸ ਭਾਟੀਆ ਨੇ ਬੋਲਦੇ ਹੋਏ ਕਿਹਾ ਕਿ ਪਹਿਲੀ ਲਹਿਰ ਦੇ ਦੌਰਾਨ ਵੀ ਲੋਕਾਂ ਨੇ ਲੋੜਵੰਦਾਂ ਦੀ ਬੜੀ ਸਹਾਇਤਾ ਕੀਤੀ ਸੀ ਅਤੇ ਹੁਣ ਵੀ ਜਦੋਂ ਸਰਕਾਰ ਫੇਲ੍ਹ ਹੋ ਗਈ ਤਾਂ ਗੁਰਦੁਆਰਿਆਂ ਵੱਲੋਂ ਤੇ ਕੁਝ ਹੋਰ ਸੰਸਥਾਵਾਂ ਵੱਲੋਂ ਆਕਸੀਜਨ ਦੇ ਲੰਗਰ ਲਗਾ ਕੇ ਲੋਕਾਂ ਲਈ ਬਹੁਤ ਕੰਮ ਕੀਤਾ ਜਾ ਰਿਹਾ ਹੈ। ਇਥੇ ਦੱਸਣਾ ਜ਼ਰੂਰੀ ਹੈ ਕਿ ਆਈਡੀਪੀਡੀ ਨੇ ਕੌਮੀ ਪੱਧਰ ਤੇ ਸਭ ਲਈ ਟੀਕਾ-ਸਭ ਨੂੰ ਦਵਾਈ ਮੁਹਿੰਮ ਚਲਾਉਣ ਦਾ ਫ਼ੈਸਲਾ ਕੀਤਾ ਹੈ । ਬੁਲਾਰਿਆਂਵਿੱਚ ਨਵਲ ਛਿੱਬੜ ਐਡਵੋਕੇਟ, ਡਾ ਗੁਰਵਿੰਦਰ ਸਿੰਘ, ਰਮੇਸ਼ ਰਤਨ, ਜਗਦੀਸ਼ ਚੰਦ ਅਤੇ ਪਰਮਜੀਤ ਸਿੰਘ ਸ਼ਾਮਲ ਸਨ। ਇਨ੍ਹਾਂ ਤੋਂ ਇਲਾਵਾ ਡਾ ਸੂਰਜ ਢਿੱਲੋਂ, ਡਾ ਗੁਰਸ਼ਰਨ, ਕਾਮਰੇਡ ਰਘਬੀਰ ਸਿੰਘ ਬੈਨੀਪਾਲ, ਵਿਜੇ ਕੁਮਾਰ, ਵਿਨੋਦ ਕੁਮਾਰ, ਕੁਲਵੰਤ ਕੌਰ, ਚਰਨ ਸਰਾਬਾ, ਅਵਤਾਰ ਛਿੱਬੜ ਆਦਿ ਸ਼ਾਮਿਲ ਹੋਏ।
ਕਿਸੇ ਵੇਲੇ ਇੱਕ ਨਾਅਰਾ ਬੜਾ ਲੱਗਦਾ ਹੁੰਦਾ ਸੀ। ਰੋਜ਼ੀ ਰੋਟੀ ਦੇ ਨ ਸਕੇ ਜੋ ਵੋ ਸਰਕਾਰ ਨਿਕੰਮੀ ਹੈ। ਅੱਜ ਦੇ ਮੁਜ਼ਾਹਰੇ ਵਿੱਚ ਦਹਾਕਿਆਂ ਪੁਰਾਣਾ ਇਹ ਨਾਅਰਾ ਵੀ ਬਦਲ ਗਿਆ ਕਿ ਆਕਸੀਜ਼ਨ ਦੇ ਨ ਸਕੇ ਜੋ ਵੋ ਸਰਕਾਰ ਨਿਕੰਮੀ ਹੈ!
